Jang Oh Jang ... Apo ekau termonung tu ha

Jang. Oh jang. Apo ko buek tu?

Takdo apo, Omak.

Hai, apo nak jadi ekau ni ha. Tak habih-habih termonung.

Yo lah. Bingung den mikirkan hidup ni. Selalu gagal dalam bacinto. Apo nak jadi diri ni ...

Maso umo 14, teringin nak ado teman wanita. Ado kawan-kawan sebayo dah mulo ado gelfren. Utus-utus surat, dating.

Umo 16, dapek den gelfren satu. Budak samo sekolah. Anak Cikgu Seman. Tapi dio macam suko tak suko. Tak bersemangat. Takdo passion. Malas cerito. Tinggal den. Cari pompuan yang ado keceriaan.

Sampai umo 18, den dapek keluo dengan sorang gadis yang penuh keceriaan, bersemangat dan sentiasa riang tapi terlalu emosi. Budak Ipoh. Perhubungan kami macam drama; sekojap gembiro, sekojap sodih, sekejap ketawo riang, dan sekejap menangis sampai nak bunuh diri. Tak tahan den. Baik cari yang lebih tenteram.

Hari jadi den 25, terjumpo seorang gadis yang begitu tenteram sekali orangnyo. Oghang Johor. Tapi pulak tu membosankan. Oghangnyo terlalu mudah dijangko dan serupo tak ado perasaan. Perhubungan kami membosankan, maka den raso baik cari seorang gadis yang memberi keriangan.

Pada umo 28, terjumpa den seorang gadis yang sangat riang sampai tak terikut. Budak Bangsar. Dio suko buek kojo gilo-gilo dan menjadikan den kadang-kadang susah dan kadang-kadang gembiro. Mulo-mulo seronok tapi lamo-lamo macam tak ada arah hidup ni. Mako den tak mahu laghi dengan dio dan nakkan wanita yang ado berarah tuju dan cito-cito.

Alhamdulillah, umo den 30 terjumpo wanita sedemikian. Oghangnyo cerdik bercito-cito dan realistiklah kato. Rumah oghang tuo dio tak jauh dari rumah Omak dokek Ampangan di Soromban. Kami pun kahwin. Masaalahnyo cito-cito dio terlalu tinggi. Semuo nak konop ikut cakap dio. Kito asal kampung, mano ado cito-cito nak jadi oghang bosa. Jodoh kami tak panjang. Akhirnyo bercorai. Habih semuo harto diambil nyo.

Hari ni, den dah 35. Umo dah banyak. Lebih bijaksano. Kali ni baik den cari gadis yang barang bosa ajo.